當凱悅集團推出2020年Q4嘅積分活動Bonus Journeys，各方一致認為今年10月至12月是衝擊凱悅集團會員計劃World Of Hyatt最高階會籍Globalist嘅最佳時機，阿迪哥嘔心瀝血寫咗呢篇終極懶人包，希望可以幫到有計劃想衝、又或者仲考慮緊衝唔衝嘅朋友參考。
World Of Hyatt會員等級
首先簡單介紹一吓，World Of Hyatt除咗白板會員外一共有3個尊貴會員級別及每曆年之保級要求：
● Discoverist - 10晚或25,000 base points
● Exporist - 30晚或50,000 base points
● Globalist - 60晚或100,000 base points
本文主要係針對如何衝Globalist，本身Discoverist、Exporist嘅會員福利都只係一般，因此各位玩家都會以Globalist為目標，以下係Globalist會員入住凱悅集團酒店時嘅部分重要權益及福利：
● 房間升級，包括套房 (需視乎入住情況而定)
● 延遲退房至下午4時
● 行政酒廊待遇
● 免費早餐
● 使用積分入住時可獲免費泊車禮遇
● Guest Of Honor 👉(按此)
Bonus Journeys全球積分活動
● 註冊日期：2020年10月1日至2020年11月30日前
● 入住日期：2020年10月1日至2021年1月4日
● 入住Hyatt旗下酒店可獲三倍積分
● 整個活動期間最高只可賺取共150,000額外積分
整篇文章嘅重點就係透過Q4嘅Bonus Journeys活動嘅優勢去衝Globalist，因為呢個活動係World Of Hyatt有史以來最強嘅推廣活動，今次活動除咗3倍積分外、最重重重重嘅重點係活動期間嘅合資格入住晚數亦同時會累計入去明年，即係每入住1晚，咁您嘅會員帳號會响2020年計1晚、並且2021年亦會計1晚，呢方面係有助2021年保級之用。
假設您响2020年10月1日至2020年12月31日期間入住60晚凱悅集團內嘅酒店，咁您嘅會籍就會升級至Globalist，而呢個剛升級嘅會籍本身有效期至2022年2月，不過正因為呢60房晚亦會滾存至2021年嘅保級房晚，因此响明年即使您完全不需要入住嘅情況之下呢60晚已經足已自動幫您保級，而Globalist身份會再延續多一年至2023年2月！即係足足多玩一年！
成本最低方法 - 入住香港維港凱悅尚萃酒店 (Hyatt Centric Victoria Harbour)
自從呢家酒店開業後已經成為本港World Of Hyatt會員以最低成本刷房嘅聖地，而且佢目前有一個更抵嘅長住優惠價，非常適合用來跑會籍，只要响凱悅官網👉(按此)搜尋連續入住14晚或以上，就會顯示“Long Term Stay”嘅價錢，而每晚只需$522+10%(合共$574.20)。
計吓60晚嘅成本合共幾多錢先...
$574.20 x 60 = $34,452
是的，$34,452成本仍然很高，但本身跑Hyatt嘅成本從來唔低，重點係升級後可以玩足超過兩年！
其實最佳衝Globalist最佳時機唔係單憑以上兩項條件，以下兩個優惠活動亦成為重要嘅催化劑。
Hyatt新開業酒店積分優惠活動
呢個活動一直都有，每晚入住列表內嘅新酒店可以獲得500 World Of Hyatt積分，500分約值港幣$65，而目前香港維港凱悅尚萃酒店正正就列入咗新酒店列表之內，於2020年12月31日入住每晚可獲額外500分。
計算每晚實際成本
前文所講到，假設利用香港維港凱悅尚萃酒店“Long Term Stay”嘅優惠房價去跑，假設只係白板會員每消費$1美元可獲取5分，房價$522約可賺取336分，然後再加乘Bonus Journeys三倍積分(336 x 3 = 1,008分)、再叠加新開業酒店嘅額外500分，即係每晚一共約有1,508分進帳，大約值港幣$199！
房價每晚連服務費為$574.20減去積分回血$199，實則每晚成本只需$375.20！
我哋玩積分遊戲嘅玩家應該視積分或飛行里數都係錢，所賺取返嚟嘅積分都係回本嘅一種方式。
於萬豪、希爾頓、凱悅酒店集團酒店憑已登記合資格美國運通簽賬可獲享現金回贈
呢個優惠活動對於衝Globalist會籍非常重要，重點係你需要有好多張美國運通卡，當成功登記活動後於凱悅集團本港有參與活動嘅四家酒店消費累積簽賬滿$2,400就可以獲得$400簽賬回贈，因為每張美國運通卡只可以享受回贈一次， 因此如果手上有越多卡、回贈，金額就越豐厚。
不過登記係有限額，萬豪集團就已經滿咗額，但發文當日凱悅集團就仍然可以登記，建議大家盡快登記。
================================================
👉 按此進入美國運通白金卡申請網址 👈 (2020年10月31日或之前透過此連結成功申請並作首次簽賬可獲額外$800 SOGO禮券)
有關美國運通白金卡會員福利與及可免費登記各大酒店集團尊貴會籍之詳情請👉(按此)
================================================
縱觀以上各項種種因素，今年10月至12月的確係衝Globalist嘅史上最佳時機，但係仲有更簡單及便宜嘅捷徑嗎？是有的...不過條件未必每個人都可以符合。
World Of Hyatt尊貴會籍挑戰2020
只要响2020年11月16日前成功申請尊貴會籍挑戰的話，在申請被接納後90天內只需入住滿20晚就可以晉升為Globalist會員，會籍有效期至2022年2月，不過申請人必需是任職國際性大企業嘅職員(以電郵地址驗證)。
計吓20晚嘅成本合共幾多錢先...
$574.20 x 20 = $11,484
不過假設你成功申請挑戰，而活動期間入住20晚，而呢20晚亦會滾存到2021年，但如果你想長玩的話、响2021年你仍然需要保級，即係需要响2021年再住多40晚(計埋滾存20晚就=60晚)， 咁樣會籍就會再延多一年至2023年2月。
咁若果你並非任職國際大企業，咁可以申請尊貴會籍挑戰嗎？阿迪哥亦聽聞過另有門路可以申請，例如相熟酒店嘅銷售部門或其他方式，至於乜嘢係其他方式？ 因為阿迪哥本身都未有呢方面實戰經驗、連支付寶戶口都冇，因此就不便介紹，中國地大物博，大家可以試試自行硏究。
雖然今年可能係衝Globalist嘅最佳時機，但係各位都仍然需要考慮清楚自己將來嘅保級能力，實際上每年硬住60晚並非一件易事。
衝唔衝？保得到先好衝！
在此感謝Terry隊長個多月以來一直分享衝Globalist嘅各項貼士，對於阿迪哥完成本篇文章十分有幫助。
================================================
【同時間進行凱悅酒店集團嘅優惠活動】
● World Of Hyatt - Bonus Journeys三倍積分活動+入住晚數滾存到2021年合資格晚數【入住日期：2020年10月1日至2021年1月4日】(按此)
● World Of Hyatt - 無需入住於酒店餐廳用餐可賺取3倍獎勵積分及兌換積分可獲15%積分回贈【活動日期：即日至2020年10月8日】(按此)
● World Of Hyatt - 兌換積分入住酒店住宿、餐飲或水療服務可獲15%回贈【活動日期：即日至2020年10月8日】(按此)
● World Of Hyatt - 尊貴會籍挑戰2020【需於2020年11月16日前登記】 (按此)
注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Agoda、Hotels.com、Booking.com...等)均不能計算在內。
● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)
沒有留言:
張貼留言