千禧國際酒店集團(Millennium Hotels & Resorts)推出全新"My Millennium"會員計劃

以英國倫敦為基地嘅千禧國際酒店集團(Millennium Hotels & Resorts)全球超過130家酒店，酒店主要涵蓋亞洲、歐洲、中東、紐西蘭及美國(按此查看酒店列表)，雖然係英國集團，但最強嘅陣地反而係中東地區嘅酒店，淨係單單講杜拜目前就已經有共10家酒店，但講到大家最為熟悉嘅幾家酒店就應該係前身是日航酒店、响尖東而家已經改咗名嘅New World Millennium Hong Kong Hotel，仲有响新加坡嘅幾間酒店：M Hotel Singapore、Studio M Hotel Singapore...等...相信好多網友都會曾經住過，仲有一間就係位於泰國布吉島Patong最大型購物中心Jungceylon連成一起嘅Millennium Resort Patong Phuket，而Millennium酒店集團一共有四個品牌：

● Leng's Collection：以集團創辦人郭令明先生之名字“令”命名之品牌，是集團内最高端品牌，酒店通常位於市中心之黃金地段及標誌性的建築物之內

● M Collection：可算係該集團中相對近乎boutique hotels嘅品牌，房間以新穎時尚設計並帶有cozy及loft風格，M Collection系列分別有兩個支線品牌：M Social及Studio M

● Millennium Collection：顧名思義就係品牌裡面嘅主打，應該屬於行走classic premium路線，而Millennium Collection品牌內亦有三個系列支線：Grand Millennium、Millennium Hotels與及M Hotels

● Copthorne Collection：行走中階路線的品牌，因此價錢亦比以上品牌偏低，Copthorne系列包括兩個支線：Copthorne Hotels及Kingsgate Hotels

Millennium 品牌

言歸正傳，最近千禧酒店集團推出咗全新嘅會員計劃名為My Millennium (我的千禧)，呢個係一個非常直接嘅會員計劃，因為計劃內係人人平等的，唔需要再為什麼Gold、Platinum、Diamond、Ambassador而煩惱，因為沒有任何會員級别，有的只係累積積分及使用績分咁簡單，所有入住待遇都係用積分去換取，My Millennium主要嘅會員褔利如下：

● 專享折扣會員房價
● 每10晚可獲雙倍積分 (下文再解釋)
● 於生日及其他特別日子獨享節慶禮遇
● 賓客可使用“我的積分”提升住宿體驗，於預訂時獲享如客房升級、設施及服務折扣等優惠，還可享有即時兌換的數碼優惠券

My Millennium會員褔利

於官網訂房及入住，會員可累積My Millennium嘅積分，稅前房價每USD1可獲10分，而當累積入住每10晚就可獲過去10晚所獲嘅積分雙倍，舉個例子，若果入住每晚稅前嘅房價都係USD200，咁每晚入住完就可以獲取2,000分啦，本身入住10晚即係可以獲得共20,000分，但因為累積夠10晚就可以獲績分雙倍，因此住完10晚實際可以一共得到40,000分。

至於兌換績分可以抵達酒店時換取酒廊待遇、餐飲消費券等，當然績分計劃最基本嘅換取免費住宿、及房間升等都可以啦！My Millennium嘅績分就類似Accor嘅玩法係revenue base嘅，每1,000績分可換USD5消費，即係若果房價每晚係USD200就需要用40,000分去兌換，玩法其實係類似現金回贈、欠缺咗搵sweet spot兌換嘅好玩性，會員亦可以用績分兌換禮品及零售產品現金券，但通常咁換都係唔抵架喇。

按此免費申請成為My Millennium會員

The Chelsea Harbour Hotel (倫敦)

另外，為慶祝My Millennium會員計劃推出，千禧集團舉辦咗一個名為“百萬富翁”嘅活動，其中一名幸運會員可以獲得100萬積分(等值USD5,000)，由即日起至2019年9月30日，新加入及現有My Millennium會員凡入住全球各地參與計劃的酒店即可參加是次抽獎活動，活動期間內每次透過官網訂房並完成入住均可獲得一次參加大抽獎活動資格，抽獎結果將會於2019年11月4日公佈。

【參加“百萬富翁”活動方法】

1. 申請免費成為My Millennium會員 (按此)
2. 填寫抽獎活動網上參加表格 (按此)
3. 於官網預訂住宿並由即日起至2019年9月30日完成入住，每次入住均可獲得一次抽獎機會 (按此進入千禧國際酒店官網)

符合參加“百萬富翁”活動必須是以下國家及地區居民：

● 美國50個州 (羅德島、 佛羅裡達州、紐約州除外)
● 英國
● 紐西蘭
● 阿聯酋
● 新加坡
● 中國 (包括香港及澳門)

按此查看“百萬富翁”活動完整條款及細則

Grand Copthorne Waterfront (新加坡)