Hilton Honors – 如何善用希爾頓積分訂酒店住宿

自從Hilton收起酒店兌換表、積分使用動態浮動制(dynamic pricing)之後(但其實又唔係完全浮動)，佢哋嘅積分CP值已經大不如前，話雖如此，但爛船都有三分釘，希望透過呢篇文章可以將阿迪哥嘅淺薄知識能夠幫到大家善用希爾頓積分訂房。

前文提到自從Hilton積分改制後CP值已經大不如前，其實應該用「貶值」來形容會更好，先講返啲good old days嘅例子，阿迪哥曾經响2011年以每晚30,000分入住蘇梅島Conrad Koh Samui、但目前基本需要95,000分一晚；2013年以每晚50,000分入住大溪地Hilton Moorea Lagoon Resort、目前已經升到80,000分；舉個近啲嘅例子、2017年深圳DoubleTree每晚10,000分、而家已經升到28,000至30,000分！

Hilton Moorea Lagoon Resort by 阿迪哥

雖然其他酒店集團會員計劃都不斷有貶值情況，但係希爾頓嘅貶值程度絕對係冠絶同行！

Hilton Honors積分大致上有以下幾個值得注意嘅使用方式，大家可以參考一下，用得習慣了就會有自己一套使用積分嘅模式，因為每個人價值都不同。

【Standard Room Reward】

最基本嘅積分使用方法就係用來訂基本房型，阿迪哥响發文時(2019年11月)對希爾頓積分嘅估值係每1,000分約值USD6(=港幣約$47)，因此若然您係認同阿迪哥嘅估值，咁以下呢一個使用積分嘅例子就算做著數：

● Conrad Maldives Rangali Island

積分預訂一基本房Beach Villa每晚95,000分，參見以上估值USD1,000分=USD6、95,000分約值USD570(約港幣$4,461)，積分房無需付稅及服務費：

Beach Villa每晚95,000分

若然同日期嘅Honors Early Saver預付價會員價連稅係USD799.80(約港幣$6,260)、而一般可在限期前取消嘅Honors Discount會員價連稅係USD1,062.40(約港幣$8,314)，因為積分房都同樣可以响限期前免費取消，因此用Honors Discount對比會比較公平、合理，响呢個情況下用積分訂房足足抵咗HK$3,853！

Honors Early Saver預付價會員價USD799.80 (連稅)

Honors Discount會員價USD1,062.40 (連稅)

以上呢個例子差價比較極端、所以用積分絕對比較值得，但好多時候其他酒店以呢個計算方法可能計出來嘅差距不必有咁大分别，所以大家要自己衡量，阿迪哥覺得若然您想訂嘅酒店計算出來用積分估值或現金(連稅總和)兩者都差唔多的話，咁就用現金入住吧！因為以現金入住可以賺取Hilton Honors積分、兼且信用卡付款又可賺取信用卡積分。

總括嚟講，一般情況下利用希爾頓積用來訂奢華頂級酒店價值較高，例如：馬爾代夫Waldorf Astoria、Conrad Maldives、蘇梅島Conrad Koh Samui (旺季時)、大溪地Conrad Bora Bora Nui...等；又或者5,000分一晚嘅最低級別酒店都抵，最佳例子係峇里島Hilton Garden Inn Bali Ngurah Rai Airport，不過而家5,000分嘅酒店已經非常「罕有」。

Conrad Bora Bora Nui (conradhotels.com)

【Premium Room Rewards】

除咗基本房外，Hilton積分其實係可以直接用來訂其他比較高等級嘅房間，但係呢個方式係完全採取動態浮動制，即係當時嘅現金訂房價係直接反映積分價，因此絕大部份情況下係唔抵嘅，但係或者都可能都有特殊例子都未定，所以建議你訂房時都最好以估值USD1,000分=USD6對比下先，又再次以同一家酒店做個例子：

● Conrad Maldives Rangali Island

若然用Premium Room Rewards訂Grand Water Villa，每房每晚積分是490,000(估值是USD2,940)：

Grand Water Villa每晚490,000分

而同樣可以限期前免費取消嘅Honors Discount價錢連稅只係USD1,791.01，兩者差距極大！

Grand Water Villa - Honors Discount價錢USD1,791.01(連稅)

如果你真係想用積分、但又要想入住非基本房，例如Executive或套房的話，不妨試試先以積分訂基本房、然後聯絡有關酒店查詢保證升房嘅附加費，呢個方法往往比起直接用Premium Room Rewards訂房CP值較高。

【第5晚免費】

呢個方式係使用積分最佳用法，所有Hilton Honors嘅精英會員(Silver以上)都可以使用全積分入住連續5晚、只需付4晚積分，但始終建議預訂前用番1,000分=USD6嘅成本法比較一下五晚總和究竟係用積分抵啲、定係用現金抵啲。

透過第5晚免費以上例子住5晚合共380,000分

注意第5晚免費優惠不適用於現金入住及積分+現金入住。

【積分+現金】

會員預訂積分房時系統會出現一條slider、從而去選擇呢次預訂現金及使用積分嘅比率，每個預訂最少使用5,000分，响呢個情況下每1,000分大約會令呢個預訂平咗USD5 (約港幣$40)，因此呢個方式並唔係希爾頓積分嘅最佳使用方式，同埋用積分扣除咗嘅部份入住完之後唔會有積分、現金畀少咗、即係積分少咗啦！咁樣係會雙重蝕本的。

Points & Money

不過若然唔係經常入住嘅朋友囤積咗少量積分、咁如果想清埋佢都係一種方法。

其實每個人賺取積分、使用積分、對積分嘅價值都唔同，所以以上使用方式及估值只係比大家參考，玩積分、里數其實最重要係自己得覺得值就得啦！

注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Expedia、Agoda、Hotels.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)

特價租車網站推介：Rentalcars.com