World Of Hyatt - 今年凱悅天地值得跑夠100晚嗎？

今年凱悅天地會員計劃最精彩部分係更新咗嘅Milestone Rewards，當中加入咗一啲American Airlines嘅獎勵選項，而當中最大亮點係100晚禮物選項加入咗AAdvantage Platinum會籍，即係相等於寰宇一家Sapphire，咁究竟今年值唔值得跑夠100晚呢？

眾所週知，要成為凱悅Globalist會員每年需入住60晚就夠，但Milestone Rewards每10晚會為會員送出額外嘅獎勵，例如10,000積分及套房升級獎勵等，令到會員滿足60晚保級後仍然有動力繼續住落去！

如果在正常情況之下，要獲得寰宇一家Sapphire，即係相等於國泰金卡、英航銀卡或美國航空白金，每年花費响機票上至少都要超過十幾萬港幣。

除非你係需要經常出差，而機票係由公司支付可以自然跑航空公司會籍，否則若果你對寰宇一家Sapphire會員福利有興趣，例如可帶一位同行旅客入商務Lounge、優先行李處理、商務艙check-in櫃位、額外行李及優先登機等，係絕對值得考慮今年跑滿100晚！

點解咁值得？原因有以下各項：

更低成本獲取酒店、航空尊貴會籍

前文所講單跑航空會籍，估計每年至少都要花費十幾萬港幣响機票上，若假設酒店平均每晚HK$1,000，100晚成本只係HK$100,000就已經可以雙得凱悅Globalist及AAdvantage白金，亦即係寰宇一家Sapphire。

積分兌換酒店住宿仍可累計合資格晚數

同航空公司會籍唔同，酒店常客計劃即使以積分兌換酒店住宿都可累計合資格晚數，變相成本更低。

凱悅Milestone Rewards獎勵豐厚

里程碑獎勵每年由20晚起，每10晚會獲得不同獎勵一直到150晚，獎勵包括嘉賓軒使用獎勵、套房升級獎勵、免費住宿獎勵、Guest Of Honor、5,000積分獎勵、10,000積分獎勵及一系列美國航空獎勵等，令跑晚數入住期間享受質素提升，(👉按此)查閱Milestone Rewards完整資料。

對於阿迪哥，今年凱悅100晚係基本目標，然後再上望150晚，但大家注意近期凱悅對會員違規行為採取殺一儆百，一律封號處理，阿迪哥奉勸大家切忌買晚數或空刷。