疫情下無得去旅行、所以就懷緬過去常陶醉一下，阿迪哥旅行最喜歡就係住resort，要揀出10間最希望重住嘅酒店其實並不容易，最愛嘅不一定係最奢華，入選可能係因為酒店服務窩心、或可能係當中嘅一些經歷、又或者係一份情懷。
首先容許阿迪哥出茅招，因為本文置頂圖片嘅酒店The Ritz-Carlton Ras Al Khaimah, Al Hamra Beach 👉(按此)响小弟心目中擁有神級地位，絕對係世上最愛，因此响本文擁有豁免權，以下10家則排名不分先後。
💣💉💥 播毒時間開始！
【01】Anantara Rasananda Koh Phangan Villas (泰國帕岸島)
位於蘇梅島附近嘅Koh Phangan，最著名係Full Moon party嘅舉行島嶼，阿迪哥最喜歡嘅係派對以外嘅時間呢度嘅寧靜、酒店外嘅沙灘任何時候泳客不多、而酒店背後又有小村落，方便購買必需品之餘、又有地道泰菜餐廳，寧靜中亦方便。
【02】Angsana Velavaru (馬爾代夫)
InOcean Pool Villa水上屋完全脫離主島、在環礁内自成一角，房間設計新穎大膽、私人泳池超大。
【03】COMO Cocoa Island (馬爾代夫)
曾經是阿迪哥嘅最愛酒店(直至2018年)、一共入住過三次，酒店位處的私人小島靚到窒息，是阿迪哥曾遊訪嘅兩座最美麗島嶼之一，由其是島上最著名嘅拖尾沙灘，酒店服務令人有回家感覺，亦因此令阿迪哥成為了COMO酒店集團嘅粉絲。
【04】Conrad Koh Samui (泰國蘇梅島)
位於蘇梅南部Phang Ka半島依山而建，酒店自成一角，無論响酒店任何位置都享有無適Five Islands靚景，整間resort全部房間都係Pool Villa，即使足不出戶都可宅一日。
【05】Conrad Bora Bora Nui (法屬玻里尼西亞Bora Bora)
阿迪哥响Bora Bora一共住過四家酒店，論景觀呢間唔算最好，但勝在服務佳、pool boys主動安排活動，因為酒店依山而建，因此亦可以走到小山崗上，從高處欣賞Bora Bora美景。
**阿迪哥入住期間酒店名字為Hilton Bora Bora Nui
【06】Conrad Maldives Rangali Island (馬爾代夫)
阿迪哥人生第一家以酒店積分兌換嘅酒店住宿，响十幾年前算得上非常奢華，酒店由兩個私人小島組成、兩島又一條粉藍色鐵橋達接、無邊際泳池、水底餐廳，响當時黎講已屬於非常離地，更首次遇上Bvlgari沐浴備品，過咗一個不生難忘嘅旅程。
**阿迪哥入住期間酒店名字為Hilton Maldives Rangali Island
【07】Naladhu Private Island Maldives (馬爾代夫)
Naladhu全島只有17間pool villlas，酒店連接另外兩家Anantara酒店：Anantara Dhigu及Anantara Veli，三個私人酒店島由棧橋相連，Naladhu住客可自由使用其他酒店設施、但其他兩家酒店住客卻不能進入Naladhu私人島範圍，因此Naladhu可避世外、亦可進入其餘兩島享用餐廳及設施。
【08】Gili Lankanfushi, Maldives (馬爾代夫)
一直夢想入住嘅酒店、幸運地最終成事，酒店以魯賓遜漂流記場景為設計概念，是馬爾代夫最早有管家服務嘅酒店。
**阿迪哥入住期間酒店名字為Soneva Gili by Six Senses
【09】The Residence Maldives at Falhumaafushi (馬爾代夫)
酒店以服務取勝，每位員工任何時候都笑容滿面，除咗神級地位嗰間外，暫時仍未有任何一間酒店服務能超越The Residence Maldives。
【10】The Ritz-Carlton Langkawi (馬來西亞浮羅交怡)
酒店除咗服務卓越外，最重要係有兩個主泳池，每當住客一進入泳池就提供一個藤籃、裡面載著冰水、防曬乳及冰凍毛巾，相當窩心，而當中建响石頭上嘅無邊際泳池更係阿迪哥遇過其中一個最喜歡嘅泳池。
注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Expedia、Agoda、Hotels.com...等)均不能計算在內。
沒有留言:
張貼留言