香港喜來登酒店 - The Café花咲蟹鮮度遊自助晚餐

香港喜來登酒店嘅The Café 7月重開，朋友約食自助晚餐gathering，本身對食物零期待、但一抵達見到啲食物賣相就已經超煩惱。

阿迪哥都已經講過好幾次對自助餐麻麻(好煩呀你呀伯，成日重覆、重覆又重覆講)，因為本身又唔食生蠔、但經過上次沙田萬怡嘅自助餐👉(按此)焗住食咗之後😆、生蠔原來又OK喎，今次香港喜來登就有任食生蠔，所以阿迪哥都食咗少少。

坐低當然先要問侍應拿口罩套，因為阿迪哥近排通常都會測試吓酒店提供嘅口罩套質素，而今次獲得係紙袋一個，真係弱咗少少...

等齊朋友當然先吹吓水先啦，話題當然離唔開有關Staycation，不過大家都對近排疫情翻爆感到憂慮，其實阿迪哥當時就心急如焚，因為本身已經肚餓到爆腸、但又唔好意思自己衝出去攞嘢食，同埋朋友來齊之前巡咗一轉、食物款式好吸引。

今次自助餐主打北海道花咲蟹，其中一位朋友就先拿一碟凍海鮮，包括波士頓龍蝦、鱈場蟹及青口等比大家相機先食。

而生蠔有兩款，分别來自美國及愛爾蘭，一款creamy、另一款重海水味，連以前唔食生蠔嘅阿迪哥都食咗好幾隻。

阿迪哥鍾意食熱海鮮，其中有一個現煮live cooking station供應鐵板燒香煎巨型帶子及虎蝦，阿迪哥一共encore咗兩次！

香煎鴨肝多士my飛佛

乳豬都好食

呢個玉環鮑魚脯大家一定要捕實去拎

除玉環鮑魚脯外，熱葷阿迪哥就只係另外試咗香草醬焗田螺，因阿迪哥超鍾意pesto醬，所以覺得超正。

可惜quota有限，其他熱葷就無緣享用了...

咖喱、薄餅雖然都好吸引完全冇掂過

頭盤有各款Canapés真係冇hea做

湯都有三款，分别有川貝花膠海底椰好湯、冬瓜赤小豆排骨湯及蟹肉粟米忌廉湯，三款都好飲！

朋友推薦食麵檔，話雲吞麵好好食，阿迪哥就覺得雲吞一般般啦、反而米粉係用幼滑嘅新竹米粉好味。

甜品都唔弱，有湯圓超開心，仲有六款Häagen-Dazs，不過雪榚所挑選嘅口味太普通，都只係雲呢拿、朱古力、士多啤梨、綠茶、芒果嗰大路野。

阿迪哥過往有時食自助餐食咗一轉後就已經唔知再攞乜嘢食好，但今次就完全冇呢個景況，好多款美食都想encore，不過大叔食量有限、煩惱在於胃口小、因此必需嚴選目標食物，為免食過量所以要適可而止。

阿迪哥自問沒有翻本能力，但係Marriott 白金會員以上平日有7折、信用卡優惠亦有天天88折(暫時只有星期三至日有提供自助晚餐)，折後$600蚊左右絕對抵食！

👉 按此進入酒店官網及訂房

注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Expedia、Agoda、Hotels.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)