Marriott - 沙田萬怡酒店MoMo Café (伊比利亞黑毛豬主題自助晚餐)

阿迪哥月尾返要屋企畀家用、順便食埋酒店主餐廳MoMo Café每位加五毫子嘅「伊比利亞黑毛豬主題自助晚餐」，究竟好唔好食、有啲乜嘢食呢？

睇吓啲冰鎮海鮮先，鱈場蟹腳、熟蝦、黃金螺、青口...等

波士頓龍蝦會間唔中出現下，睇你好唔好彩數。

每位客人送兩隻日本室津生蠔，本身阿迪哥唔喜歡食生蠔，但職員送到上檯就即管試試，點不知幾新鮮、幾好食喎😋。

啲前菜唔算吸引...

刺身有三文魚、八爪魚、希靈魚、鯛魚及醋青魚，三文魚都唔肥美，阿迪哥興趣不大...

 壽司十足十Lounge foods質素...

麵檔啲麵同餸直頭同早餐一樣...😑

今次主打係西班牙伊比利亞黑毛豬主題，黑毛豬主要集中响熱葷菜式，當中包括燒味嘅蜜汁黑毛豬叉燒、咕嚕黑豚肉、 椒鹽黑毛豬肋排等，反而覺得熱葷啲菜式幾好食。

本身不時有西班牙乳豬出現，但係要搶嘅，好快被秒殺，要搶食阿迪哥就真係冇辦法、連影相都冇機會。

現煮意粉都幾OK，但太大碟頂唔順，因為阿迪哥食好少嘢就勁飽。

以下三張圖嘅食物阿迪哥又以為自己去咗某間酒店嘅行政酒廊...呀唔係，似tea buffet多啲。

舞茸合桃燉赤肉湯OK的

生菜魚肉湯都可以

甜品嘅雞蛋仔係堅好食、同埋Mõvenpick雪糕一共有6款味道。

飲品選擇只有凍紅茶、凍咖啡、冰水、熱咖啡、紅茶。

因為今次係6月「萬豪紛享會員日」嘅加+$1送兩位晚餐嘅優惠，本身都要住架啦，所每位加5亳子食buffet dinner對食物就冇乜要求啦，但至少真心覺得整體唔算差。

不過由7月起自助晚餐將會換上海鮮盛薈為主題，每晚供應多達十幾款新鮮海鮮，近排香港正進入報復式消費階段，因此好多酒店自助餐都好難訂檯，而相信沙田萬怡酒店可能會比較易訂，因為阿廸哥用餐當晚星期六都仲有些少吉檯，而且價錢都幾親民。

圖片來自酒店官方Facebook

沙田萬怡酒店MoMo Café自助餐Marriott Bonvoy任何級別會員自助餐有7折，以下係正價價錢 (需以原價加10%服務費)：

– 中午自助餐 (星期一至五成人$308/小童$178、星期六日及公眾假期11:30-13:30成人$368/小童$198、14:00-16:00成人$298/小童$158)
– 晚市自助餐 (星期一至四成人$488/小童$268、星期五六日及公眾假期/前夕成人$580/小童$320)

申延閱讀：Marriott Bonvoy - 香港萬豪酒店餐廳優惠及參與酒店餐廳折扣清單【2020年6月版】(按此)

注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Expedia、Agoda、Hotels.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)