Marriott Bonvoy - 萬豪旅享家會員2021年選擇50晚及75晚Choice Benefits禮遇

阿迪哥提提大家2021年萬豪旅享家會員入住滿50及75晚嘅Choice Benefits禮選必須於2022年1月7日前自行作出選擇、否則50晚/75晚禮遇系統會自動設定為5晚套房升等券 (Suite Night Award)，如果您一直有留意迪迪所講當踏入2022年先至選擇75晚嘅一晚免費住宿禮遇，有效期會去到2023年12月31日，差不多足足有兩年有效期！

萬豪旅享家會員每曆年(1月1日至12月31日期間)達到50晚合資格房晚(Elite qualifying nights)就可以晉升/或保級Platinum Elite級別、而滿75晚就可達更高一級嘅Titanium Elite，當會員到達50晚嘅時候除咗可以獲Platinum外，仲可以選擇一份Choice Benefits嘅禮遇、另外住滿75晚則可以另有一次Choice Benefits禮遇，不過可惜若果再晉升到最高級嘅Ambassador Elite就唔會再有第三次禮遇選擇。

咁Choice Benefits實際上有乜嘢禮遇選擇呢？等阿迪哥簡介一下：

Platinum Elite (50合資格晚數)

當達到50房晚Choice Benefits可以有以下五項選一項：

● 5晚套房升等券 (SNA)
● 贈送Silver Elite給任何一位會員
● 萬豪床上用品6折
● 5晚合資格晚數 (EQN)
● 美金US$100慈善捐款

50房晚Choice Benefits五選一

先講一下最唔值得揀嘅一項應該係送Silver Elite畀朋友，萬豪銀卡嘅權益只有10%額外積分同埋延遲退房(但不保證)，所以用處不大。

另外，萬豪嘅睡床大家瞓過都知道好舒服，不過價錢都好貴吓，床品組合而少都要萬幾蚊港幣起跳，如果真係有此需要嘅朋友都可以考慮一下。

比較多人選擇嘅兩項應該係5晚套房升等券 (SNA)或者5晚合資格晚數，使用SNA唔係保證一定可以升套房嘅，使用時可以直接响想申請升套房嘅預訂裡面操作，如果申請成功會响入住前大約5日收到電郵通知、如果申請失敗SNA就會發還返去會員帳號內，阿迪哥較早前入住毛里裘斯St Regis👉(按此)就曾經成功使用套房升等券，關於實際如何操作SNA，詳情請👉(按此)。

Beachfront St Regis Suite (St Regis Mauritius Resort)

另一項較多人選擇嘅禮遇係5晚合資格晚數(5 EQN)，若果打算保級或升級Titanium Elite咁呢5晚EQN會好有用，因為若果選擇咗呢5晚EQN就只需要實際多住20晚就可以合符Titanium嘅75晚要求，而呢5晚EQN會計入終身累積晚數，有助達成終身會籍要求，但係呢5晚EQN只會適用於當時年度會籍保級，舉個例子：若果2020年達成入住50晚，即使响2021年1月初先選擇Choice Benefits，嗰5晚EQN都只係會計返入去2020年保級/或升級。

最後一個選項係美金US$100慈善捐款，作為慈善用途當然非常好，但係以上選項之中除咗贈送Silver Elite之外，其餘選項阿迪哥都認為價值比$100美金為高，因此如果想捐款不如實際用現金較好。

Titanium Elite (75合資格晚數)

當達到75房晚Choice Benefits可以有以下六項選一項：

● 5晚套房升等券 (SNA)
● 1晚免費住宿券 (40,000積分內酒店)
● 贈送Gold Elite給任何一位會員
● 萬豪床上用品6折
● 5晚合資格晚數 (EQN)
● 美金US$100慈善捐款

75房晚Choice Benefits五選一

大家可見以上75晚禮遇選項跟50晚嘅選項好類似，所以SNA、床品6折、慈善捐款就不作重複介紹。

至於贈送Gold Elite畀朋友/家人當然比50晚嘅Silver Elite好，金卡會員入住有歡迎禮250或500分(視乎品牌)、25%額外積分及另外兩項不保證嘅權益：房間升級及延遲退房至下午兩點。

而5晚合資格晚數 (EQN)有助於同年升級最高的Ambassador Elite，但係需要符合100晚EQN外、仲有就係最困難嘅全年稅前$20,000美金累積消費額，因此其實呢個選項幫助唔大。

最後，亦都係同50晚最大分別嘅係1晚免費住宿券，免費放券可以用於40,000分以内酒店一晚，40,000用到最盡可以係旺季嘅Category 5、或者淡季嘅Category 6酒店 (按此查看兌換表)，相信呢個會係比較多會員選擇嘅禮遇。

會員若果選擇5晚套房升等券 (SNA)或1晚免費住宿券、呢兩種電子券會直接存入會員帳號，未用嘅券將會响翌年嘅12月31日後作廢，至於使用方法阿迪哥將會稍後再跟大家分享，各位記住今年嘅Choice Benefits最遲要响翌年嘅1月8日前要揀選，否則系統會自動幫你選擇SNA。

👉 按此並登入帳戶選擇Choice Benefits

關於萬豪嘅Choice Benefits，阿迪哥建議大家可以重溫以下兩篇相關文章：

👉 Marriott Bonvoy - 選擇50晚及75晚Choice Benefits禮遇
👉 Marriott Bonvoy - Choice Benefits套房升等券(Suite Night Award)操作簡介

選擇75晚禮遇1晚免費住宿券小實驗

2020年阿迪哥75晚嘅禮物選擇係一晚免費住宿券，住宿券使用有效期至2021年12月31日，阿迪哥當時做咗一個小實驗，等到踏入咗2021年先操作選擇呢項禮物，响按入內文睇答案之前，大家估下將會有乜嘢事發生？

當選擇一晚免費住宿券奬勵時(one Free Night Award)系統顯示房券有效期至2021年12月31日：

 

但當到帳後新的免費房券有效竟然顯示為2022年12月31日(上面嘅房券係2019年禮物，而因疫情關係延期多一年，下面顯示嘅房券先至係今次選擇嘅新房券)：

所以原來响1月初先至作選擇房券足足多一年有效期！

======================================================

注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Agoda、Trip.com、https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouiHotels.com、Booking.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)