酒店入住報告 - 香港JW萬豪酒店「JW Lobster-cation住宿套票」

 

原本JW Marriott Hong Kong呢個JW Lobster-cation住宿套票只做到12月尾，但發現最近已經延長至2022年3月31日，睇嚟應該都幾受歡迎，而綜觀各界對呢個全龍蝦套餐評價頗高，因此阿迪哥都忍受不了要去試試。

Flint餐廳

Lobster-cation四道菜晚餐用餐地點位於酒店5樓的Flint，其實Flint亦即係各位白金或以上會員都熟悉行政酒廊同一場地，這裏是一個行政酒廊及餐廳兩用場所。

Flint / 行政酒廊

Flint / 行政酒廊

Flint / 行政酒廊

Flint主打是烤肉，每天供應優質行政午餐及四道菜晚餐，招牌菜包括龍蝦濃湯、美國內布拉斯加肉眼牛扒、波士頓龍蝦及黑毛豬肉漢堡等。

而阿迪哥今次品嚐嘅Lobster-cation四道菜全龍蝦晚餐係特別為呢個住宿套票而設計嘅，要預訂呢個指定套票先有得食。

Lobster-cation四道菜全龍蝦晚餐

頭盤

職員首先奉上熱辣辣嘅麵包，老土啲講句外脆內軟，跟麵包嘅牛油係睇得出用心去調教過，因此特別綿滑。

熱辣辣嘅麵包

頭盤暖龍蝦沙律，阿迪哥一聽到個「暖」字、然後配上沙律就真心覺得好吸引，沙律本身响一般世俗眼光係凍食㗎嘛，加上開始入冬、沙律加上一份溫暖感就更加想試，龍蝦肉配上羅文生菜、大頭菜、上邊再放上一啲洋蔥碎，而醬汁更是精髓所在，fine dining之中嘅沙律醬正常唔係用橄欖油就係檸檬汁，今次採用蒜蓉牛油做醬感覺新鮮又好味！

暖龍蝦沙律

湯

龍蝦濃湯係Flint其中一個signature，上菜嘅時候龍蝦肉及忌廉預先放响碗裡面，濃湯由暖壺入面倒出嚟，整個presentation一百分！個湯有濃郁嘅龍蝦味及非常香滑，一個正字！

龍蝦濃湯

龍蝦濃湯

主菜

主菜可以選擇波士頓龍蝦配扁意粉或波士頓龍蝦配8安士美國內布拉斯加肉眼牛扒(後者每位需要加$200)，Flint有自家嘅烤爐，美國內布拉斯加肉眼牛扒係佢哋引以自豪嘅招牌菜，阿迪哥建議每個主菜各要一個大家分享，咁就可以一次過試哂兩款招牌菜。

主菜

波士頓龍蝦配扁意粉嘅龍蝦以明火烤制，不會有過份調味、就係食佢嘅鮮味，龍蝦肉質爽口彈牙，扁意粉用橄欖油、雜菇及西班牙香腸炒成，味道香濃正常。

波士頓龍蝦配扁意粉

波士頓龍蝦配美國內布拉斯加肉眼牛扒，塊肉眼阿迪哥選擇咗五成熟，牛扒肥瘦分明，有碳烤香味、非常juicy，整塊牛扒冇筋，真真正正實食冇黐牙，而附上據講用上20幾種材料精制而成嘅牛扒醬汁令塊扒嘅肉味更加提升。

波士頓龍蝦配8安士美國內布拉斯加肉眼牛扒

用來配牛扒嘅芥辣都有四款選擇

甜品

據職員所講甜品每一季都會轉換，今次嘅選擇分別有芝士栗子雪山及酒漬櫻桃朱古力。

甜品

芝士栗子雪山裏面含有冧酒栗子忌廉蓉、芝士忌廉及杏仁粒，擺盤好似太陽系9大行星圍繞住太陽公轉，栗子撻底香脆、芝士忌廉味香濃、帶有濃郁嘅栗子味、兼且又唔太甜，12月份食都幾配合節慶氣氛， 呢份甜品很高分！

芝士栗子雪山

阿迪哥唔食櫻桃、而且對於甜品嘅mousse興趣不大，選擇酒漬櫻桃朱古力係完全為咗讀者而揀，若果唔係為咗寫入住報告一定唔會每款甜品各點算一份，點不知係大驚喜！雖然酒漬櫻桃迪迪最終都冇食，但朱古力mousse連埋餅底及朱古力片一齊食嘅口感非常豐富，最重要而係因為平常迪迪唔喜歡mousse係因為感覺太軟好唔實在、好似食泡沫咁，不過今次呢份朱古力mousse製作得好實淨，夾埋底下嘅朱古力片食落感覺好rich，不過始終就覺得甜咗少少，若果能夠令甜度減半仲會更好。

酒漬櫻桃朱古力

總括今次呢個Lobster-cation晚餐合乎預期，因為本身對香港JW萬豪F&B有一定期望及指標，而呢個餐就發揮到標準之上，龍蝦控一定要試試。

套餐包括每日一杯咖啡或茶

免費房內迷你吧

JW Lobster-cation住宿套票包客房迷你吧一次，小食包括薯片、腰果及合味道杯麵各一、汽水四罐及啤酒兩罐。

免費房內迷你吧

免費房內迷你吧

JW Café自助早餐

套票包括雙人自助早餐，JW嘅自助早餐質素就眾所周知，尤其係佢哋師父自家精製嘅中式點心就最出色，蝦餃、豬肉燒賣、小籠包、山竹牛肉及手拉腸粉全部都好好食，有酒樓質素，不過阿迪哥就唔重覆詳細描述佢嘅早餐，如果有興趣嘅朋友可以重溫以下兩篇香港JW萬豪酒店嘅入住報告：

● 酒店入住報告：香港JW萬豪酒店Stay Well Dine Well 2021住宿套票及萬豪金殿中菜廳 (👉按此) 
●Hotel Review：JW Marriott Hotel Hong Kong (香港JW萬豪酒店)  (👉按此)  

JW Café自助早餐中式點心

JW Café自助早餐中式點心

JW Café自助早餐中式點心

JW Café自助早餐中式點心

JW Lobster-cation住宿優惠

● 入住日期：即日至2022年3月31日

JW Lobster-cation住宿優惠每晚$2,580起+10%，費用包含：

● 酒店客房住宿一晚
● 入住當晚兩位於Flint品嚐龍蝦主題四道菜晚餐
● 雙人JW咖啡室自助早餐
● 免費房內迷你吧一次
● 客人可額外點選一杯Flint特調龍蝦血腥瑪莉，每位另付$220+10%

直接進入酒店專屬頁面搜尋比較容易：👉 按此進入酒店官網及訂房

預訂方式

於酒店官網👉(按此)，搜尋房價時响“Special”位置內的“Corporate/Promo/SET#”欄位輸入優惠代碼：ZJ1

直接進入酒店專屬頁面搜尋比較容易：👉 按此進入酒店官網及訂房

以上優惠預訂後均可以於入住限期前免費取消，因此大家可以放心預訂。

======================================================

 注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Agoda、Trip.com、https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouiHotels.com、Booking.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)