酒店餐廳用餐報告 - Keyakizaka鐵板燒 (東京君悅酒店)

早前响東京六本木打算用餐，抵達東京君悅酒店 Grand Hyatt Tokyo 時本身最想試Keyakizaka鐵板燒但walk-in滿座碰壁，幸好一星期後再返回東京訂好枱就興奮地預備用餐。

鐵板燒午餐有四款，分別係A、B、C餐及招牌Keyaki午餐，阿迪哥和朋友就決定點價錢每位¥9,240嘅B餐，連稅後每位¥10,626(約HK$555)。

Keyakizaka鐵板燒午餐

入座後職員就會將點選咗嘅餐餐牌放响客人面前

開始嘅時候廚師先展示6粒肥美嘅北海道帶子，鐵板燒帶子使用蕃茄、辣牛油、越煮越香，本來唔算肚餓嘅阿迪哥肚子開始雷動了！

大大隻北海道帶子

食帶子最理想就係一啖一粒就最滿足！

鐵板燒北海道帶子

其實當時已經急不及待，不過都係影埋相先

第二道菜阿迪哥覺得煮法頗特別的，定係因為第一次响日本食正宗鐵板燒？廚師用一塊類似玻璃膠紙包住長崎產鯛魚，連埋黑松露高湯放响鐵板上面煮熟。

廚師用一塊類似玻璃膠紙包住長崎產鯛魚响鐵板上面煮熟

完成後再放黑松露高湯調味

主菜日本產和牛西冷，當廚師顯示還未開始煮嘅食材和牛西冷扒及時令蔬菜時，單單看到牛扒嘅油脂分佈期待指數已經滿分。

日本產和牛西冷

五成熟嘅和牛粒每粒都入口即溶，融合肉本身嘅油脂加一口野菜中和，除咗唔夠喉之外就已經是零缺點。

日本產和牛西冷完成品

和牛西冷配上三款醬汁

食完主菜之後嘅蒜香牛肉蘆筍炒飯就顯得平平無奇、麵豉湯和漬物亦很平凡。

蒜香牛肉蘆筍炒飯、麵豉湯和漬物

甜品方面廚師先表演火焰燒白桃，拍照後職員就帶客人請移玉步到另一邊嘅普通餐枱享用甜品，咁樣嘅處理方式應該係有效率地使客人佔用鐵板燒位置嘅時間減低、可以响預定時間內完成、再接下一輪食客。

廚師表演火焰燒白桃

請移玉步到另一邊嘅餐枱享用甜品

甜品是剛才的火焰燒白桃配雲呢拿雪糕，阿迪哥就唔食桃嘅，所以就畀咗同行朋友食、自己只吃雲呢拿雪糕，朋友說甜品的白桃可以、但味道並不驚喜。

火焰燒白桃配雲呢拿雪糕

午餐包括一杯咖啡或茶

阿迪哥認為享受美食除咗色、香、味之外仲有服務，選擇响酒店用餐當然配合埋賺到積分就令整頓用餐體驗昇華，今次用餐食物水平不錯、雖然食物並非驚艷，但配合職員服務友善及用餐環境，就令阿迪哥非常享受這個周末午餐。

 Keyakizaka鐵板燒

Keyakizaka鐵板燒

同行朋友話阿迪哥係食個環境、食個服務，但阿迪哥反駁目前日元匯率對港幣5算超低、唔响目前匯率下好好享受高質素酒店美食、唔通等到9算先至望梅輕嘆？

Keyakizaka鐵板燒

======================================================

注意：所有阿迪哥介紹嘅酒店活動，除特別註明外一律需要透過以下酒店集團官網或App預訂，透過網上旅行社預訂(例如：Agoda、Trip.com、https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouid=https://www.trip.com/hotels/w/home?Allianceid=1258953&SID=3191552&ouiHotels.com、Booking.com...等)均不能計算在內。

● Marriott - 萬豪集團官網 (按此)
● Hilton - 希爾頓集團官網 (按此)
● Accor - 雅高集團官網 (按此)
● IHG - 洲際集團官網 (按此)
● Hyatt - 凱悅集團官網 (按此)
● Shangri-La - 香格里拉集團官網 (按此)
● Radisson - 麗笙酒店集團官網 (按此)
● Best Western - 貝斯特韋斯特國際集團 (按此)